Category: News

Isang awit na pumupukaw sa tema ng “Year of Ecumenism, Inter-Religious Dialogue, and Indigenous Peoples” ang nabuo sa naganap na 7th Philippine Conference On New Evangelization (PCNE7) sa huling araw nito noong Enero 29, 2020.

Sa bahagi nito ng PCNE7 na pinamagatang, “Pananagutan”, pinangunahan ni G. Alvin Barcelona ng Light of Jesus Community ang pagbuo ng nasabing awitin sa pamamagitan ng pakikipag-ugnayan at pagkalap ng mga ideya mula sa mga dumalo sa PCNE7.

Sa tulong ng mga Kabataan, seminarista, madre, kaparian, PWDs, katutubo, at ng Kanyang Kabunyian Luis Antonio Cardinal Luis Antonio Tagle ay unti-unting nakapagbuo ng musika habang ginaganap ang Conference at ito ay pinamagatang “Magkaiba-Magkaisa”.

Hinugot ni G. Barcelona ang mga ideya mula sa katagang tumutukoy at naaayon sa Temang ng PCNE 7 na “At Sino ang Aking Kapwa?” na nakaugat naman sa tema ng “Year of Ecumenism, Inter-Religious Dialogue, and Indigenous Peoples”.

Namumukod tangi at makahulugan ang mga naiambag nina Cardinal Tagle at ng mga kinatawan ng PWD’s, Diyosesis ng San Pablo, at ng Congregation of St Benedictine Sisters of the Eucharistic King. Ito ay ang mga katagang “pangamba at pagasa, luha at saya”, “tinig”, “ikaw, ako, tayo, sila”, “magkaiba”, na sumasalarawan at naaayon sa mga suliranin na kaylangang mapagkasunduan at pag-usapan sa mga darating na diyalogo ngayon Taon ng Ekumenismo.

Ang mga salita ay nilapatan agad ng musika at isinayaw ng mga ng lahat habang ginuguhit ang isang Caricature ng Cardinal sa entablado. Inaasahang ito ay maging palagiang awit ng bawat isa para iuwi ng mga delegato sa kani-kaniyang mga Diyosesis.

Ang 7th Philippine Conference on New Evangelization ay taunang ginaganap bilang paghahanda sa ika-500 Anibersaryo ng Kristiyanismo sa Pilipinas sa 2021. Ang naging Conference sa taong kasalukuyan ay ang naging pagbalik-tanaw din sa PCNE na ginanap nang dumating ang Kanyang Kabanalan Papa Francisco sa Pilipinas noong Enero 2015. (~Sonia Raymundo)

—————-

MAGKAIBA-MAGKAISA
(Awiting Nabuo Noong PCNE7)

Intro: (2X)
Woo ohh whoo hoo… woo ohh whoo hoo
Woo ohh whoo hoo … woo ohh whoo hoo

1st Stanza:
Iba iba ating daan, iba’t ibang karanasan
Magkalihis ating landas, puno ng takot at dahas

Bridge:
Pangamba’t pag-asa, luha’t saya
Pangarap mo pangarap ko”y isa

Chorus:
Sa mundong magkaiba, nais nating magkaisa
Ikaw, ako, tayo sila sama-sama

Magkalayo may, magkaugnay iisa ang paglalakbay
Kapwa ko abot kamay, sama sama aawait ng
Hallelujah … hallelujah, … hallelujah … hallelujah (2x)

Repeat Intro

2nd Stanza
Anu man ang ating lahi, sa diyos tayo’y natatangi
Maubos man ating tinig, ang diyos nating nakikinig

Repeat Bridge
Repeat Chorus
Repeat Intro

Dumagungdong ang Smart Araneta Coliseum sa pagtatapos ng unang araw ng 7th Philippine Conference on New Evangelization (PCNE) noong Enero 28, 2020 dahil sa Concert for Peace na siyang huling bahagi nito.

“Mahal ka namin, Cardinal!” ang maririnig na hiyaw mula sa ng mga nanood ng nasabing Concert na kung saan nangingibabaw ang tinig ng mga Kabataan habang ang Kanyang Kabunian Luis Antonio Cardinal Tagle ay umaawit.

Inawit ng Cardinal ang “Imagine” ni John Lennon na nagkapagbigay ng kakaibang aliw at sigla sa mga manonood.

Kasama ng Cardinal na nagtanghal ang iba’t ibang mang-aawit at mananayaw na sina Miss Ramonne, Toto Sorioso, Davey Langit, Vanya Castor, Lara Maigue, Pael Gutierrez, ang Bayang Barios WTS, RFC, at ang LA Manila Dance Ambassadors.

Panalo din sa mga Kabataang nanood ang mga awitin ng Bayang Barios at ang Kaleidoscope ni Francis Magalona na binigyan buhay ng grupong RFC. Kapansin-pansin pa rin ang giliw ng karamihan sa mga musika na pinasikat ni Michael Jackson gaya ng “Black Or White”, “Heal the World” at “We are the World”. Ang etnikong sayaw naman na inihandog ng La Manila Dance Ambasador ay nagbigay ng panandaliang lubay sa mga manonood.

Ang nasabing Concert for Peace ay nakaugat pa rin ng selebrasyon para sa “Year of Ecumenism, Interreligious Dialogue, and Indigenous Peoples”. Ang tema ng mga musikang inihandog sa nasabing Concert ay nagpapatungkol sa pakikipag-ugnayan at pagmamahal sa iba’t ibang etniko, kultura, katauhan at pananampalataya ng ibat ibang mamamayan.

Ito rin ay nagsilbing despedida ni Cardina Tagle para sa kanyang bagong katungkulan sa Roma bilang “Prefect of the Congregation for the Evangelization of Peoples”. (~Sonia Raymundo)

Isang makabagong pananaw sa pagmamahal ang binahagi ng Lubos na Kagalang-galang Jose Colin Bagaforo, D.D. sa kanyang pambungad na pagbati sa ikalawang araw ng Alay-Kapwa 2020 Launching para sa Luzon noong Pebrero 4, 2020.

“Hindi ko hinahati ang pagi-ibig, bagkos pinaparami ko ito,” kwento ng Obispo sa nasabing pagpupulong na sinambit ng isang magulang.

Ang nasabing kwento ay tungkol sa isang kahera na nagtanong sa kanilang guwardiya kung ilan ang anak nito. Sumagot ang gwardiya ng lima na ikinagulat nito kung kaya’t naitanong kung paanong pinaghahati-hati ang pagmamahal nito sa kanyang mga anak.

Inihalintulad ng Obispo ang kwentong ito sa kadahilanan ng pag-aalay kapwa. Ika niya, kung maraming tao ang matutulungan, marami ding mababahaginan ng pagmamahal at tunay na makakapagbahagi sa lahat ng talento, ng sarili, ng pagmamahal.

“Napamahagi ang Katawan at Dugo ni Kristo sa atin,” pangwakas ni Obispo Bagaforo.

Nauna niyang kinuwento sa mga delegato ng Alay Kapwa Launching 2020 mula sa iba’t ibang diyosesis at arkidiyoses ng Luzon kung paanong nangibabaw ang pagtutulungan sa kanilang lugar sa Kidapawan, Cotabato nang sila ay tinamaan ng sunod-sunod na paglindol.

Binahagi niya rin ang kanyang mga natutunan mula sa nasabing karanasan. Maraming tulong ang dumating sa kanilang lugar lalo na mula sa mga Parokya sa Metro Manila. Dito ay naramdaman nila ang pagtutulungan at pagbabahaginan ng kanilang kapwa.

Ang Alay Kapwa Launching 2020 para sa Luzon ay taunang ginaganap bilang paghahanda sa nalalapit na Kwaresma na magsisimula sa Araw ng Mga Abo na kung saan nakagawian nang magpangalap ng mga envelope para lagyan ng donasyon para sa mga programa ng Simbahan para sa mahihirap. Sa unang pagkakataon ito ay hinost ng Novaliches para sa Luzon. (~Jhen Samson)

Sa kanyang Inspirational Message sa ikalawang araw ng Alay Kapwa Launching 2020 para sa Luzon noong Pebrero 4, 2020, binunyag ni Novaliches Bishop Roberto Gaa, D.D. ang pangangailangan ng mga Pilipino na lumabas sa kanilang mga pamilya’t komunidad sa pag-Alay Kapwa.

“Ang pag-aalay kapwa ay nagsisimula sa ating mga tahanan,” wika niya sa Ingles, “Ang pag-aalay kapwa ay dapat lumabas ng inyong mga tahanan—pagbibigay tulong sa masmalaking pamilya ng Simbahan.”

“Paano tayo magiging mapagbigay at mapagmahal sa labas ng labas ng simbahan?” Tanong niya sa may higit isang libong taong nagpuno ng Cathedral Shrine and Parish of the Good Shepherd sa unang araw ng nasabing kaganapan.

Pinaliwanag ng Obispo kung paanong ang pagbibigayan ay nagsisimula sa isang pamilya at kaanong pinalalago ng magulang sa kanilang mga anak ang tunay na kahulugan ng pagbibigyan. Ito ay dadalhin ng mga bata, ani niya, hindi lamang sa loob ng kanilang tahanan kundi maging sa iba na tinuturing natin na kapwa: kapitbahay at kaparokya. Ngunit, binigyan diin niya na hindi natatapos sa sariling pamilya ang pagbibigayan.

Ayon kay Obispo Gaa, walang taong napakahirap na hindi kayang magbigay. Ang pagbibigayan ay hindi lamang sa pagtulong sa kapwa relihiyon kundi sumasakop ito ay sa lahat kahit hindi Katoliko o Kristiyano. Ani niya, ito ay pagtulong na lagpas-lagpas pa sa nakagawian ng bawat isa.

Bago magwakas, pinaalala ng Obispo sa lahat na huwag matatakot sa mga panahong walang-wala nang pera sapagkat ang biyaya ng Diyos ay nag-uumapaw. Sabi niya, doon pumapasok ang biyaya ng Diyos sa mga oras na iyon. Hindi pababayaan ng Diyos ang taong masayang nagbibigay sa kapwa. (~Jhen Samson)

Ang mahalagang papel ng Birheng Maria, na tinaguriang Star of the New Evangelization, ang naging isa sa binigyang diin ng Kanyang Kabunyian Luis Antonio Cardinal Tagle sa naganap na 7th Philippine Conference on New Evangelization (PCNE7) sa kanyang homiliya noong Enero 28, 2020.

“At sa mahal na Ina, ang Ina, makilala natin ang bawat isa bilang kapatid sa iisang pamilya,”ani ng Cardinal sa libu-libong taong nakikinig sa loob ng Smart Araneta Coliseum.

Nauna dito sinabi niya na, “Sa ilalim ng patnubay ng iisang Ama, matuklasan nawa natin muli ang kapatiran at pagiging kapwa.”

Pinalawig niya ang tema ng PCNE7, “At Sino Ang Aking Kapwa?”, na base naman sa kasalukuyang tema ng taon sa Pilipinas na Year of Ecumenism, Inter-Religious Dialogue, and Indigenous Peoples.

“Kasi minsan ang tingin natin sa kapwa ay iba sa atin,” ani Cardinal.

Ipinahiwatig niya na ang bunga ng unang pagkakasala ng ating unang magulang na si Eba’t Adan ay ang hindi pagkakaunawaan at pag-uugnayan. Kung kaya’t “ang regalo ay naging salot”. Ang pagkasira ng kapatirang ito, pagbigay diin niya, ay siyang minana ng tao sa mundo.

Ipinaliwanag ng Cardinal na minarapat na sa pagbukas ng Misa ay ang pagpasalamat sa Diyos para sa Mahal na Ina, bilang Ina ng Simbahan, at dahil siya ang Ina na nag-uugnay sa ating lahat. Ipinaalala niya na ang tao ay nabigyan ng pag-asa sa paanan ng Krus at binuo muli ng Panginoong Hesus ang nasirang kapatiran. Sa paanan ng Krus ni Hesus bumukal ang bagong pamilya na nakabatay sa kalooban ng Diyos.

Bago nagsimula ang Banal na Misa ay pinasigla sa saliw ng musika at pag-indayog ng mga estudyante, layko at mga kaparian ng Diyosesis ng Imus sa isang Karakol. Doon ay naihatid at naitanghal ang Birhen Nuestra Seniora Del Pilar sa harap ng mga dumalo sa PCNE 7.

Kung kaya sa pagtatapos ng kanyang homiliya nagbilin ang Cardinal sa lahat na,”Sa Nuestra Senora Del Pilar, ating ihabilin ang sarili at ang pagkakaisa ng Sangkatauhan.”

Sa pagdaos ng PCNE7, binigyang diin ang hangaring mapaigting ang pag-uunawaan at pagkakaibigan ng mga tao sa mundo iba’t-iba man ng Pananampalataya at kultura. Ang PCNE ay taunang ginaganap bilang paghahanda sa ika-500 Anibersaryo ng Kristiyanismo sa Pilipinas. Inaasahang ang naganap na PCNE7 ang huli nang pagkakataong idaraos ito dala ng pagkadestino na ng Kanyang Kabunyiang Luis Antonio Cardinal Tagle sa Roma. (~Ramon Alonzo)

Pagpapahayag ng Pag-ibig ng Diyos ang naging sentro ng Homiliya ng Lubos na Kaggalang-galang Rolando Santos, D.D., Obispo ng Alotau-Sideia, Papua New Guinea sa Banal na Misa na nagbukas sa pagdiriwang ika-25 Anibersaryo ng World Youth Day (WYD) Manila ng Diyosesis ng Novaliches noong Enero 11, 2020.

“Kayo ay tinawag hindi lamang matutunan ang Mabuting Balita kundi upang ipahayag din ito sa iba,” pagbibigay-diin ng Obispo sa Ingles sa mga naging delegato ng WYD at mga kinatawan ng Ministry ng Youth ng Noaliches (MOY Nova) na nagtipon sa Cathedral Shrine and Parish of the Good Shepherd sa nasabing kaganapan.

At dahil alam ni Bishop Santos na halos lahat ng mga Kabataan ay gumagamit ng cellphone, iminungkahi niya na gamitin ito, kasama ang makabagong teknolohiya upang, “ipamahagi ang Mabuting Balita at ipangalap ang kagandahang asal”.

Binigyang-diin ni Obispo Santos ang tema ng selebrasyon na, “Tell the World of His Love—25 Years After”, kung saan sinabi niya na ang ang pagpapahayag ng Pag-ibig ni Kristo para sa atin ay nananatiling isang malaking hamon hindi lamang para sa mga naging delegado ng WYD 1995 kundi pati na rin ng mga Kabataan ngayon at sa mga susunod pang henerasyon ng mga Kabataan.

Para sa kanya isa sa mahalagang misyon ng mga Kabataan sa ngayon ay kung paano nila ipapahayag sa mundo ang pag-ibig ni Kristo sa lahat, na paalalahanan sila na tayong lahat ay mahal ni Kristo.

Naniniwala ang mahal na Obispo na ang Apostolic Exhortation ni Papa Francisco, ang “Christus Vivit”, ay karugtong lamang ng tema ng WYD Manila. Ipinaalala niya sa mga Kabataang naroon sa Katedral na sila ay hindi lamang tagatanggap ng Salita ng Diyos. Sa kabila ng mga nararanasang pagsubok, ang kanilang misyon ay ang pagpapalaganap nito bilang kanilang ambag para sa ikabubuti ng Simbahang Katoliko at ng mundo.

At para naman sa mga naging delegado ng WYD 1995, sinabi ni Bishop Santos na dahil karamihan sa kanila ay may sarili nang mga pamilya, hindi naman ito hadlang para ipagpatuloy nilang isabuhay ang habilin ni San Juan Pablo II sa kanila dalawampu’t limang taon na ang nakakaraan.

“Ipaalam niyo sa inyong mga anak kung gaano sila kamahal ng Diyos,” winika niya sa Ingles.

Idinagdag niya na maituturing din na isang bokasyon ng mga nakatatanda ang paggabay sa kanilang mga anak o sa mga Kabataan upang matuklasan kung ano ang pangarap ng Diyos para sa kanila at upang matutunan nilang magdesisyon batay sa kanilang Pananampalataya kay Hesus at ang pagtulong sa kapwa.

Ang pagdiriwang ng ika-25 Anibersaryo ng World Youth Day Manila sa Diyosesis ng Novaliches ay nagsilbing isang malaking pagkikita muli ng mga kaparian, dating Kabataang lingkod ng Quezon City North Ecclesiastical District (QCNED) at ng Novaliches Diocese Parish Youth Ministry (NDPYM), mga kasalukuyang Kabataang lingkod ng Ministry On Youth (MOY Nova)—dating Commission On Youth (COY Nova), at ng mga naging delegato ng WYD: Manila (1995), Paris (1997), Italy (2000), Toronto (2002), Cologne (2005), Sydney (2008), Madrid (2011), Rio (2013), Krakow (2016) at Panama (2019). (~Shirly Benedictos)

The partnership between the Diocese of Novaliches, through its Justice and Peace Ministry (JPM), and the Initiatives for Dialogue and Empowerment through Alternative Legal Services (IDEALS) went up the next level with the signing of a Memorandum of Understanding (MOU) last December 4, 2019 at the Caritas Novaliches Office in Fairview, Q.C.

With the objective of assisting families of human rights victims and help them integrate back to society, the MOU expanded IDEALS’ services beyond documentation of legal cases and include the education component and legal assistance.

The salient points of the MOU, among others, include the initial documentation and classification by JPM of the needs for human rights education as well as legal and paralegal services; with IDEALS facilitating such education wherein the principles of human rights, the rule of law as well as the basic handling of violation cases in the community are discussed.

The Most Rev. Roberto O. Gaa, D.D., signing for the Diocese, and Edgardo Ligon, IDEALS’ executive director, both lauded the partnership. The Bishop said IDEALS’ mission matches the role of the Church.

“It matches the role of the Church as the voice and representative of the marginalized, disempowered and vulnerable groups,” the Bishop said in Filipino, adding that the Church is an institution that always stands for what is right, and most of the time, being silenced for doing so.

“If the Church remains faithful in her role, we will not fail,” he continued. “It is not possible for the Church not to take a stand.”

During the MOU signing, Vicar General for Pastoral Affairs Rev. Fr. Antonio E. Labiao revealed the human rights violations that had transpired over the years, which included problems on land and housing with a lot of demolitions in Quezon City and the extra-judicial killings (EJKs) that led to the much-needed collaboration between the Diocese and IDEALS.

“We thought this is the right time to formally set up the Justice and Peace Ministry,” Fr. Labiao revealed, adding the need for legal missions in the community level to initially educate people became evident. (~Lulu Reclusado-Nario)

Naglabas ng isang babala ang Catholic Bishops Conference of Korea (CBCK) ukol sa isang kulto na mula Korea na meron nang sangay dito sa Pilipinas.

Tinatawag na “Shincheonji, Church of Jesus, The Temple of the Tabernacle of the Testimony”, ang nasabing kulto ay nagpapanggap bilang iba’t-ibang organisasyon gaya ng “Heavenly Culture World Peace Restoration of Light” (HWPL), “International Women’s Peace Group” (IWPG), “World Alliance of Religious Peace” (WARP) na siyang nagaaya sa iba’t-ibang obispo na makisalo sa kanilang mga aktibidad at siya ring nagpapalaganap ng mga maling katuruan ukol sa Bibliya.

Ang nasabing babala ay ipinadaan ng CBCK sa isang sulat na pinadala sa Pangulo ng Catholic Bishops Conference of the Philippines (CBCP) na si Lubos Kagalang-galang Romulo Valles.

Pinaalalahanan ni Lubos Kagalang-galang Hyginus Kim Hee-joong, Pangulo ng CBCK, ang CBCP ang ukol sa mga tiwaling gawain ng nasabing kulto at ang iwasan ang makisalamuha sa kanila. (~Minnie Agdeppa)

Para sa kabuang nilalaman ng nasabing sulat, CBCK_WarningOnCult.

Kasama sa paglabas ng Diyosesis ng Novaliches ng Pagpapamalas ng Suporta at Pagpapahayag ng Tiwala’t Paniniwala para sa Obispo-Emerito ng Novaliches na si Lubos Na Kagalang-galang na Teodoro Bacani, Jr., Arsobispo ng Lingayen-Dagupan na si Lubos na Kagalang-galang Socrates Villegas, Obispo ng Cubao na si Lubos na Kagalang-galang Honesto Ongtioco, at Obispo ng Kalookan na si Lubos Kagalang-galang Pablo Virgilio David ay ang mga panalanging babasahin sa Misa sa lahat ng Parokya ng Diyosesis.

Inilathala sa Website ng Diyosesis nitong Oktubre 4, 2019, ang nasabing Pagpapamalas o “Manifestation of Support and Declaration of Faith and Confidence” sa Ingles ay ipinangalap naman sa mga Parokya ng Diyosesis kasama ng Panalangin Para Sa Paghilom At Panalangin—pati ang Ingles nito na Prayers of Healing and Unity—at Special Intentions In the Prayers Of The Faithful sa isang email blast at pinamahagi din sa Facebook Page ng Diyosesis.

Ayon kay Vicar for Administration Msgr. Jesus Romula Ranada sa Ingles sa email na naglalaman ng instructions ukol dito, “ang Manifesto sa Ingles at Filipino versions nito ay nararapat na ipangalap sa lahat ng parokya para basahin sa lahat ng mga parokyano.”

“Ang ‘Special Prayer For Healing And Unity’ ay nararapat bigkasin matapos magrosaryo para sa buong buwan ng Oktubre,” dagdag niya.

Pinagdiinan ng nasabing Manifesto na ang Obispo Bacani at ang mga kasamahan nito ay inosente at pawang napagbintangan lamang. Sa katunayan sila ay nagpahayag lamang ng nararapat para sa ikabubuti ng nakakarami alinsunod na rin sa kanilang tungkulin bilang mga pari at alinsunod sa paggamit sa kanilang karapatan bilang mamamayan ng Pilipinas ma makapagsalita ng sariling opinyon. (~Minnie Agdeppa)

Narito po ang links sa mga nabanggit na dokumento sa itaas:

Manifestation of Support and Declaration of Faith and Confidence
Pagpapamalas ng Suporta at Pagpapahayag ng Tiwala’t Paniniwala
Special Prayer For Healing And Unity
Panalangin Para Sa Paghilom At Panalangin
Special Intentions In the Prayers Of The Faithful

Pinaalala ni Commission on Youth Director ng Diyosesis ng Novaliches (COY Nova), Reb. Pad. John Harvey David Bagos sa nakaraang BEC Big Day Quirino Tandang Sora District na ginanap sa Rockville Subdivision Covered Court noong Setyembre 28, 2019 ang malaking tungkulin ng mga BEC sa pagkakaroon ng mga Kabataang Lingkod sa Simbahan.

“Nais ko lang po ipaalala sa inyong lahat na kayo po ang kanlungan at pinagmumulan ng mga Kabataang Lingkod ng ating Simbahan,” ani ng pari sa kanyang Mensahe sa harap ng may pinakamalaking pagtitipon ng BEC Big Day na naganap sa Diyosesis.

“Mula sa ating maliliit na komunidad sa ating area umuusbong ang mga Kabataan na nakikiisa sa atin ngayon,” dagdag niya sa mga nakikinig na mula sa apat na Bikaryato ng Distrito: Ascension of Our Lord, Our Lady of Mercy, San Bartolome, at San Isidro Labrador.

Dahil dito, hiniling ng bagong-ordinang pari at bagong-luklok na direktor sa mga BECs “na nananatiling aktibo sa ating Parokya at pamayanan” na huwag panghihinaan ng loob sa kanilang gawain bilang BEC lalung-lalo na sa pagiging mabuting ehemplo sa Kabataan na siya namang nagkakayag sa mga ito na maglingkod sa Simbahan.

“Huwag po kayong magtamlay sa pagpapalago, sa pagpapanibago, at sa paghuhubog at pagsuporta sa ating mga Kabataan,” udyok niya, “tungo sa kanilang tungkulin at bahagi sa pagpapanibago na ito ng Simbahan.”

“Kailangan po natin ang mga leaders at BEC members na kaisa ang Kabataan na tutulong sa amin araw-araw na kung papaanong ang Salitang ito ay isinasagawa araw-araw sa mga gawain na pamparokya o pangkomunidad,” pagbibigay niya ng diin.

Pinaalalahan din ng pari ang mga Kabataan na huwag matakot lumapit sa mga BECs at sa mga “elders” ng kanilang mga parokya’t pamayanan lalo pa’t ang mga ito ay may karunungang makakatulong sa kanila sa buhay at sa kanilang paglilingkod sa Simbahan.

Si Pad. Bagos ang ikalawa sa nagbigay ng mensahe noong BEC Big Day Quirino-Tandang Sora District bago nagkaroon ng Banal na Misa na pinangunahan ng Mahal na Obispo Roberto Gaa, D.D. Naunang nagbigay ng mensahe si Reb. Pad. Rudy Tulibas na siyang tumatayo na BEC Quirino Tandang Sora District Priest Coordinator.

Ang BEC Big Day ay isang pagdiriwang ng Taon ng Kabataan sa pakikipagtulungan ng BEC Nova at COY Nova. Sa taong ito unang ginanap ang pagdiriwang sa kada-Distrito ng Diyosesis—naunang ipinagdiwang ang sa Commonwealth District noong Setyembre 14, 2019 at sa Caloocan District noong Setyembre 21, 2019.

Ayon kay BEC Nova Animator Benjamin Custodio, ang pagganap ng BEC Big Day sa mga Distrito ay alinsunod sa ideya ng dating Obispo na si Lubos na Kagalang-galang Antonio R. Tobias, D.D. upang masmaraming tao ang makilahok at upang makita ang pagkakaiba-iba ng bawat Distrito. (~Minnie Agdeppa)