Categories
News

‘Magkaiba-Magkaisa’ Nabuo Ng PCNE7

84454283_2793544157426169_1076605867106762752_o
Si Alvin Barcelona at ang iba pang tumulong para mabuo ang kantang “Magkaiba-Magkaisa” noong huling araw ng PCNE 7, Enero 29, 2020, sa Smart Araneta Coliseum. (Larawan ni Minnie Agdeppa)

Isang awit na pumupukaw sa tema ng “Year of Ecumenism, Inter-Religious Dialogue, and Indigenous Peoples” ang nabuo sa naganap na 7th Philippine Conference On New Evangelization (PCNE7) sa huling araw nito noong Enero 29, 2020.

Sa bahagi nito ng PCNE7 na pinamagatang, “Pananagutan”, pinangunahan ni G. Alvin Barcelona ng Light of Jesus Community ang pagbuo ng nasabing awitin sa pamamagitan ng pakikipag-ugnayan at pagkalap ng mga ideya mula sa mga dumalo sa PCNE7.

Sa tulong ng mga Kabataan, seminarista, madre, kaparian, PWDs, katutubo, at ng Kanyang Kabunyian Luis Antonio Cardinal Luis Antonio Tagle ay unti-unting nakapagbuo ng musika habang ginaganap ang Conference at ito ay pinamagatang “Magkaiba-Magkaisa”.

Hinugot ni G. Barcelona ang mga ideya mula sa katagang tumutukoy at naaayon sa Temang ng PCNE 7 na “At Sino ang Aking Kapwa?” na nakaugat naman sa tema ng “Year of Ecumenism, Inter-Religious Dialogue, and Indigenous Peoples”.

Namumukod tangi at makahulugan ang mga naiambag nina Cardinal Tagle at ng mga kinatawan ng PWD’s, Diyosesis ng San Pablo, at ng Congregation of St Benedictine Sisters of the Eucharistic King. Ito ay ang mga katagang “pangamba at pagasa, luha at saya”, “tinig”, “ikaw, ako, tayo, sila”, “magkaiba”, na sumasalarawan at naaayon sa mga suliranin na kaylangang mapagkasunduan at pag-usapan sa mga darating na diyalogo ngayon Taon ng Ekumenismo.

Ang mga salita ay nilapatan agad ng musika at isinayaw ng mga ng lahat habang ginuguhit ang isang Caricature ng Cardinal sa entablado. Inaasahang ito ay maging palagiang awit ng bawat isa para iuwi ng mga delegato sa kani-kaniyang mga Diyosesis.

Ang 7th Philippine Conference on New Evangelization ay taunang ginaganap bilang paghahanda sa ika-500 Anibersaryo ng Kristiyanismo sa Pilipinas sa 2021. Ang naging Conference sa taong kasalukuyan ay ang naging pagbalik-tanaw din sa PCNE na ginanap nang dumating ang Kanyang Kabanalan Papa Francisco sa Pilipinas noong Enero 2015. (~Sonia Raymundo)

—————-

MAGKAIBA-MAGKAISA
(Awiting Nabuo Noong PCNE7)

Intro: (2X)
Woo ohh whoo hoo… woo ohh whoo hoo
Woo ohh whoo hoo … woo ohh whoo hoo

1st Stanza:
Iba iba ating daan, iba’t ibang karanasan
Magkalihis ating landas, puno ng takot at dahas

Bridge:
Pangamba’t pag-asa, luha’t saya
Pangarap mo pangarap ko”y isa

Chorus:
Sa mundong magkaiba, nais nating magkaisa
Ikaw, ako, tayo sila sama-sama

Magkalayo may, magkaugnay iisa ang paglalakbay
Kapwa ko abot kamay, sama sama aawait ng
Hallelujah … hallelujah, … hallelujah … hallelujah (2x)

Repeat Intro

2nd Stanza
Anu man ang ating lahi, sa diyos tayo’y natatangi
Maubos man ating tinig, ang diyos nating nakikinig

Repeat Bridge
Repeat Chorus
Repeat Intro

Categories
News

Concert for Peace Naging Patok Sa Mga Kabataan

84179943_2792804857500099_8397358836951810048_o
Ang Kanyang Kabunyian Luis Antonio Cardinal Tagla habang umaawit ng “Imagine” noong Enero 28, 2020 sa Concert For Peace sa naganap na 7th Philippine Conference on New Evangelization sa Smart Araneta Coliseum. (Larawan ni Minnie Agdeppa)

Dumagungdong ang Smart Araneta Coliseum sa pagtatapos ng unang araw ng 7th Philippine Conference on New Evangelization (PCNE) noong Enero 28, 2020 dahil sa Concert for Peace na siyang huling bahagi nito.

“Mahal ka namin, Cardinal!” ang maririnig na hiyaw mula sa ng mga nanood ng nasabing Concert na kung saan nangingibabaw ang tinig ng mga Kabataan habang ang Kanyang Kabunian Luis Antonio Cardinal Tagle ay umaawit.

Inawit ng Cardinal ang “Imagine” ni John Lennon na nagkapagbigay ng kakaibang aliw at sigla sa mga manonood.

Kasama ng Cardinal na nagtanghal ang iba’t ibang mang-aawit at mananayaw na sina Miss Ramonne, Toto Sorioso, Davey Langit, Vanya Castor, Lara Maigue, Pael Gutierrez, ang Bayang Barios WTS, RFC, at ang LA Manila Dance Ambassadors.

Panalo din sa mga Kabataang nanood ang mga awitin ng Bayang Barios at ang Kaleidoscope ni Francis Magalona na binigyan buhay ng grupong RFC. Kapansin-pansin pa rin ang giliw ng karamihan sa mga musika na pinasikat ni Michael Jackson gaya ng “Black Or White”, “Heal the World” at “We are the World”. Ang etnikong sayaw naman na inihandog ng La Manila Dance Ambasador ay nagbigay ng panandaliang lubay sa mga manonood.

Ang nasabing Concert for Peace ay nakaugat pa rin ng selebrasyon para sa “Year of Ecumenism, Interreligious Dialogue, and Indigenous Peoples”. Ang tema ng mga musikang inihandog sa nasabing Concert ay nagpapatungkol sa pakikipag-ugnayan at pagmamahal sa iba’t ibang etniko, kultura, katauhan at pananampalataya ng ibat ibang mamamayan.

Ito rin ay nagsilbing despedida ni Cardina Tagle para sa kanyang bagong katungkulan sa Roma bilang “Prefect of the Congregation for the Evangelization of Peoples”. (~Sonia Raymundo)

Categories
News

Paramihin At Huwag Hatiin Ang Pagibig, Pagbahagi Ng Obispo

84815697_2803778659736052_8784232607459049472_o
Ang Lubos na Kagalang-galang Jose Colin Bagaforo, D.D. noong Alay Kapwa Launching 2020 sa Luzon na ginanap sa Cathedal Shrine and Parish of The Good Shepherd. (Larawan ni Minnie Agdeppa)

Isang makabagong pananaw sa pagmamahal ang binahagi ng Lubos na Kagalang-galang Jose Colin Bagaforo, D.D. sa kanyang pambungad na pagbati sa ikalawang araw ng Alay-Kapwa 2020 Launching para sa Luzon noong Pebrero 4, 2020.

Hindi ko hinahati ang pagi-ibig, bagkos pinaparami ko ito,” kwento ng Obispo sa nasabing pagpupulong na sinambit ng isang magulang.

Ang nasabing kwento ay tungkol sa isang kahera na nagtanong sa kanilang guwardiya kung ilan ang anak nito. Sumagot ang gwardiya ng lima na ikinagulat nito kung kaya’t naitanong kung paanong pinaghahati-hati ang pagmamahal nito sa kanyang mga anak.

Inihalintulad ng Obispo ang kwentong ito sa kadahilanan ng pag-aalay kapwa. Ika niya, kung maraming tao ang matutulungan, marami ding mababahaginan ng pagmamahal at tunay na makakapagbahagi sa lahat ng talento, ng sarili, ng pagmamahal.

Napamahagi ang Katawan at Dugo ni Kristo sa atin,” pangwakas ni Obispo Bagaforo.

Nauna niyang kinuwento sa mga delegato ng Alay Kapwa Launching 2020 mula sa iba’t ibang diyosesis at arkidiyoses ng Luzon kung paanong nangibabaw ang pagtutulungan sa kanilang lugar sa Kidapawan, Cotabato nang sila ay tinamaan ng sunod-sunod na paglindol.

Binahagi niya rin ang kanyang mga natutunan mula sa nasabing karanasan. Maraming tulong ang dumating sa kanilang lugar lalo na mula sa mga Parokya sa Metro Manila. Dito ay naramdaman nila ang pagtutulungan at pagbabahaginan ng kanilang kapwa.

Ang Alay Kapwa Launching 2020 para sa Luzon ay taunang ginaganap bilang paghahanda sa nalalapit na Kwaresma na magsisimula sa Araw ng Mga Abo na kung saan nakagawian nang magpangalap ng mga envelope para lagyan ng donasyon para sa mga programa ng Simbahan para sa mahihirap. Sa unang pagkakataon ito ay hinost ng Novaliches para sa Luzon. (~Jhen Samson)

Categories
News

Obispo Hinamon Ang Mananampalataya: Mag-Alay Kapwa Sa Labas Ng Tahanan

83679303_2806284586152126_8644735101931880448_o
Ang Lubos na Kagalang-galang Roberto Gaa, D.D., Obispo ng Novaliches, noong ikalawang araw ng Alay Kapwa Launching 2020 ng Luzon na ginanap sa Cathedral Shrine and Parish of the Good Shepherd. (Larawan ni Naeza Flores)

Sa kanyang Inspirational Message sa ikalawang araw ng Alay Kapwa Launching 2020 para sa Luzon noong Pebrero 4, 2020, binunyag ni Novaliches Bishop Roberto Gaa, D.D. ang pangangailangan ng mga Pilipino na lumabas sa kanilang mga pamilya’t komunidad sa pag-Alay Kapwa.

“Ang pag-aalay kapwa ay nagsisimula sa ating mga tahanan,” wika niya sa Ingles, “Ang pag-aalay kapwa ay dapat lumabas ng inyong mga tahanan—pagbibigay tulong sa masmalaking pamilya ng Simbahan.”

“Paano tayo magiging mapagbigay at mapagmahal sa labas ng labas ng simbahan?” Tanong niya sa may higit isang libong taong nagpuno ng Cathedral Shrine and Parish of the Good Shepherd sa unang araw ng nasabing kaganapan.

Pinaliwanag ng Obispo kung paanong ang pagbibigayan ay nagsisimula sa isang pamilya at kaanong pinalalago ng magulang sa kanilang mga anak ang tunay na kahulugan ng pagbibigyan. Ito ay dadalhin ng mga bata, ani niya, hindi lamang sa loob ng kanilang tahanan kundi maging sa iba na tinuturing natin na kapwa: kapitbahay at kaparokya. Ngunit, binigyan diin niya na hindi natatapos sa sariling pamilya ang pagbibigayan.

Ayon kay Obispo Gaa, walang taong napakahirap na hindi kayang magbigay. Ang pagbibigayan ay hindi lamang sa pagtulong sa kapwa relihiyon kundi sumasakop ito ay sa lahat kahit hindi Katoliko o Kristiyano. Ani niya, ito ay pagtulong na lagpas-lagpas pa sa nakagawian ng bawat isa.

Bago magwakas, pinaalala ng Obispo sa lahat na huwag matatakot sa mga panahong walang-wala nang pera sapagkat ang biyaya ng Diyos ay nag-uumapaw. Sabi niya, doon pumapasok ang biyaya ng Diyos sa mga oras na iyon. Hindi pababayaan ng Diyos ang taong masayang nagbibigay sa kapwa. (~Jhen Samson)

Categories
News

Maria Daan Sa Pagtuklas Ng Kapatiran

84333665_2793542097426375_2193350080495353856_o
Ang naging patron ng PCNE7, ang Nuestra Senora Del Pilar ng Diyosesis ng Imus, ang Mahal na Ina. (Larawan ni Minnie Agdeppa)

Ang mahalagang papel ng Birheng Maria, na tinaguriang Star of the New Evangelization, ang naging isa sa binigyang diin ng Kanyang Kabunyian Luis Antonio Cardinal Tagle sa naganap na 7th Philippine Conference on New Evangelization (PCNE7) sa kanyang homiliya noong Enero 28, 2020.

“At sa mahal na Ina, ang Ina, makilala natin ang bawat isa bilang kapatid sa iisang pamilya,”ani ng Cardinal sa libu-libong taong nakikinig sa loob ng Smart Araneta Coliseum.

Nauna dito sinabi niya na, “Sa ilalim ng patnubay ng iisang Ama, matuklasan nawa natin muli ang kapatiran at pagiging kapwa.”

Pinalawig niya ang tema ng PCNE7, “At Sino Ang Aking Kapwa?”, na base naman sa kasalukuyang tema ng taon sa Pilipinas na Year of Ecumenism, Inter-Religious Dialogue, and Indigenous Peoples.

“Kasi minsan ang tingin natin sa kapwa ay iba sa atin,” ani Cardinal.

Ipinahiwatig niya na ang bunga ng unang pagkakasala ng ating unang magulang na si Eba’t Adan ay ang hindi pagkakaunawaan at pag-uugnayan. Kung kaya’t “ang regalo ay naging salot”. Ang pagkasira ng kapatirang ito, pagbigay diin niya, ay siyang minana ng tao sa mundo.

Ipinaliwanag ng Cardinal na minarapat na sa pagbukas ng Misa ay ang pagpasalamat sa Diyos para sa Mahal na Ina, bilang Ina ng Simbahan, at dahil siya ang Ina na nag-uugnay sa ating lahat. Ipinaalala niya na ang tao ay nabigyan ng pag-asa sa paanan ng Krus at binuo muli ng Panginoong Hesus ang nasirang kapatiran. Sa paanan ng Krus ni Hesus bumukal ang bagong pamilya na nakabatay sa kalooban ng Diyos.

Bago nagsimula ang Banal na Misa ay pinasigla sa saliw ng musika at pag-indayog ng mga estudyante, layko at mga kaparian ng Diyosesis ng Imus sa isang Karakol. Doon ay naihatid at naitanghal ang Birhen Nuestra Seniora Del Pilar sa harap ng mga dumalo sa PCNE 7.

Kung kaya sa pagtatapos ng kanyang homiliya nagbilin ang Cardinal sa lahat na,”Sa Nuestra Senora Del Pilar, ating ihabilin ang sarili at ang pagkakaisa ng Sangkatauhan.”

Sa pagdaos ng PCNE7, binigyang diin ang hangaring mapaigting ang pag-uunawaan at pagkakaibigan ng mga tao sa mundo iba’t-iba man ng Pananampalataya at kultura. Ang PCNE ay taunang ginaganap bilang paghahanda sa ika-500 Anibersaryo ng Kristiyanismo sa Pilipinas. Inaasahang ang naganap na PCNE7 ang huli nang pagkakataong idaraos ito dala ng pagkadestino na ng Kanyang Kabunyiang Luis Antonio Cardinal Tagle sa Roma. (~Ramon Alonzo)

Categories
News

Obispo: Ang Bawat Isa Ay Tinawag Na Maging Tagapagpahayag Ng Mabuting Balita

82417813_2754164104697508_2367720504262918144_o
Ang Obispo ng Alotau-Sideia, Papua New Guinea Lubos na Kagalang-galang Rolando Santos, D.D. na siyang naging punong tagapagdiwang ng Misa para sa ika-25 Anibersaryo ng WYD Manila sa Diyosesis ng Novaliches kasama ng Obispo Imerito ng Novaliches Lubos na Kagalang-galang Antonio Tobias, D.D. at ang Obispo ng Novaliches Lubos na Kagalang-galang Roberto Gaa, D.D. noong Enero 11, 2020. (Larawan ni Aimee Mendoza)

Pagpapahayag ng Pag-ibig ng Diyos ang naging sentro ng Homiliya ng Lubos na Kaggalang-galang Rolando Santos, D.D., Obispo ng Alotau-Sideia, Papua New Guinea sa Banal na Misa na nagbukas sa pagdiriwang ika-25 Anibersaryo ng World Youth Day (WYD) Manila ng Diyosesis ng Novaliches noong Enero 11, 2020.

Kayo ay tinawag hindi lamang matutunan ang Mabuting Balita kundi upang ipahayag din ito sa iba,” pagbibigay-diin ng Obispo sa Ingles sa mga naging delegato ng WYD at mga kinatawan ng Ministry ng Youth ng Noaliches (MOY Nova) na nagtipon sa Cathedral Shrine and Parish of the Good Shepherd sa nasabing kaganapan.

At dahil alam ni Bishop Santos na halos lahat ng mga Kabataan ay gumagamit ng cellphone, iminungkahi niya na gamitin ito, kasama ang makabagong teknolohiya upang, “ipamahagi ang Mabuting Balita at ipangalap ang kagandahang asal”.

Binigyang-diin ni Obispo Santos ang tema ng selebrasyon na, “Tell the World of His Love—25 Years After”, kung saan sinabi niya na ang ang pagpapahayag ng Pag-ibig ni Kristo para sa atin ay nananatiling isang malaking hamon hindi lamang para sa mga naging delegado ng WYD 1995 kundi pati na rin ng mga Kabataan ngayon at sa mga susunod pang henerasyon ng mga Kabataan.

Para sa kanya isa sa mahalagang misyon ng mga Kabataan sa ngayon ay kung paano nila ipapahayag sa mundo ang pag-ibig ni Kristo sa lahat, na paalalahanan sila na tayong lahat ay mahal ni Kristo.

Naniniwala ang mahal na Obispo na ang Apostolic Exhortation ni Papa Francisco, ang “Christus Vivit”, ay karugtong lamang ng tema ng WYD Manila. Ipinaalala niya sa mga Kabataang naroon sa Katedral na sila ay hindi lamang tagatanggap ng Salita ng Diyos. Sa kabila ng mga nararanasang pagsubok, ang kanilang misyon ay ang pagpapalaganap nito bilang kanilang ambag para sa ikabubuti ng Simbahang Katoliko at ng mundo.

At para naman sa mga naging delegado ng WYD 1995, sinabi ni Bishop Santos na dahil karamihan sa kanila ay may sarili nang mga pamilya, hindi naman ito hadlang para ipagpatuloy nilang isabuhay ang habilin ni San Juan Pablo II sa kanila dalawampu’t limang taon na ang nakakaraan.

Ipaalam niyo sa inyong mga anak kung gaano sila kamahal ng Diyos,” winika niya sa Ingles.

Idinagdag niya na maituturing din na isang bokasyon ng mga nakatatanda ang paggabay sa kanilang mga anak o sa mga Kabataan upang matuklasan kung ano ang pangarap ng Diyos para sa kanila at upang matutunan nilang magdesisyon batay sa kanilang Pananampalataya kay Hesus at ang pagtulong sa kapwa.

Ang pagdiriwang ng ika-25 Anibersaryo ng World Youth Day Manila sa Diyosesis ng Novaliches ay nagsilbing isang malaking pagkikita muli ng mga kaparian, dating Kabataang lingkod ng Quezon City North Ecclesiastical District (QCNED) at ng Novaliches Diocese Parish Youth Ministry (NDPYM), mga kasalukuyang Kabataang lingkod ng Ministry On Youth (MOY Nova)—dating Commission On Youth (COY Nova), at ng mga naging delegato ng WYD: Manila (1995), Paris (1997), Italy (2000), Toronto (2002), Cologne (2005), Sydney (2008), Madrid (2011), Rio (2013), Krakow (2016) at Panama (2019). (~Shirly Benedictos)

Categories
News

Nova JPM-IDEALs Strengthen Fight For Human Rights With MOU

JPMIDealsMOUSigning
The Most Rev. Roberto Gaa, D.D. and Edgardo Ligon seal the fight against human rights violation with a Memorandum of Understanding signing last December 4, 2019. (Photo credit: Maria Lourdes Nario)

The partnership between the Diocese of Novaliches, through its Justice and Peace Ministry (JPM), and the Initiatives for Dialogue and Empowerment through Alternative Legal Services (IDEALS) went up the next level with the signing of a Memorandum of Understanding (MOU) last December 4, 2019 at the Caritas Novaliches Office in Fairview, Q.C.

With the objective of assisting families of human rights victims and help them integrate back to society, the MOU expanded IDEALS’ services beyond documentation of legal cases and include the education component and legal assistance.

The salient points of the MOU, among others, include the initial documentation and classification by JPM of the needs for human rights education as well as legal and paralegal services; with IDEALS facilitating such education wherein the principles of human rights, the rule of law as well as the basic handling of violation cases in the community are discussed.

The Most Rev. Roberto O. Gaa, D.D., signing for the Diocese, and Edgardo Ligon, IDEALS’ executive director, both lauded the partnership. The Bishop said IDEALS’ mission matches the role of the Church.

“It matches the role of the Church as the voice and representative of the marginalized, disempowered and vulnerable groups,” the Bishop said in Filipino, adding that the Church is an institution that always stands for what is right, and most of the time, being silenced for doing so.

“If the Church remains faithful in her role, we will not fail,” he continued. “It is not possible for the Church not to take a stand.”

During the MOU signing, Vicar General for Pastoral Affairs Rev. Fr. Antonio E. Labiao revealed the human rights violations that had transpired over the years, which included problems on land and housing with a lot of demolitions in Quezon City and the extra-judicial killings (EJKs) that led to the much-needed collaboration between the Diocese and IDEALS.

“We thought this is the right time to formally set up the Justice and Peace Ministry,” Fr. Labiao revealed, adding the need for legal missions in the community level to initially educate people became evident. (~Lulu Reclusado-Nario)

Categories
News

CBCK Nagbabala Ukol Sa Kulto

Naglabas ng isang babala ang Catholic Bishops Conference of Korea (CBCK) ukol sa isang kulto na mula Korea na meron nang sangay dito sa Pilipinas.

Tinatawag na “Shincheonji, Church of Jesus, The Temple of the Tabernacle of the Testimony”, ang nasabing kulto ay nagpapanggap bilang iba’t-ibang organisasyon gaya ng “Heavenly Culture World Peace Restoration of Light” (HWPL), “International Women’s Peace Group” (IWPG), “World Alliance of Religious Peace” (WARP) na siyang nagaaya sa iba’t-ibang obispo na makisalo sa kanilang mga aktibidad at siya ring nagpapalaganap ng mga maling katuruan ukol sa Bibliya.

Ang nasabing babala ay ipinadaan ng CBCK sa isang sulat na pinadala sa Pangulo ng Catholic Bishops Conference of the Philippines (CBCP) na si Lubos Kagalang-galang Romulo Valles.

Pinaalalahanan ni Lubos Kagalang-galang Hyginus Kim Hee-joong, Pangulo ng CBCK, ang CBCP ang ukol sa mga tiwaling gawain ng nasabing kulto at ang iwasan ang makisalamuha sa kanila. (~Minnie Agdeppa)

Para sa kabuang nilalaman ng nasabing sulat, CBCK_WarningOnCult.

Categories
Downloads

Panalangin Para sa Paghihilom at Pagkakaisa ng Bansa

O Butihin at Mapagpalang Diyos, pinupuri at pinasasalamatan ka namin sa napakamahiwagang mundo na iyong nilikha at patuloy mong inaalalayan. Tunay, mga nilikha mo ay mahiwaga, marami, magkakaiba at mabubuti. Pinupuri ka namin sa lahat ng mga taong nilalang mo, iba’t-ibang lahi, salita, paninindiga’t paniniwala. Higit sa lahat, pinupuri at pinasasalamatan ka namin sa napakalalim na pagkakaisa ng lahat sa gitna ng di matatawaran nilang pagkakaiba-iba.

Tinatanggap namin na di ganap naming napangangalagaan ang mundo at ang bawat isa. Mas nabibigyan namin ng pansin ang pagkakaiba at mga pagkakahiwalay.

Nagsusumamo kami ngayon nang may panibagong sigla, na kami bilang mga mananampalataya at mga responsableng mamamayan ng bansang ito. Nais naming ipamalas ang malakas at walang pasubaling suporta sa aming mga tagapamuno sa simbahan na pinaparatangan dahil sa pagiging tunay nilang pastol sa kanilang mga kawan. Batid naming ang malayang pagpapahayag ay tanda ng pag-iral ng demokrasya sa bansa na ginagaratiyahan ng Saligang Batas at tahasang ipinangaral ni Jesucristo “ang katotohanan ang magpapalaya sa inyo”(Juan 8:32).

Tulungan mo kaming laging ipamalas at ipahayag ang katotohanan anuman kahihinatnan, laging tumayo kasama ng walang kayang magtanggol sa sarili, at sa tabi ng mga api, dukha’t maralita. Tulungan mo kaming manindigan para sa katarungan at kapayapaan, pagkakaisa, katapatan, kabukasan, sa iba’t ibang lugar na may armadong awayan, may pakikibaka para sa panlipunang pagbabago, sa pagtatanggol ng patrimoniya ng mga katutubo, sa pagtatanggol ng aming soberanya.

Higit sa lahat nananalangin kami para sa pagkakaisa ng lahat batay sa pag-ibig, na siyang tunay na batayang lunas tungo sa paghilom sa aming bansa.

Hinihingi namin ang tulong ni Maria na aming Ina na samahan niya kami, gayun din naman ang lalat ng nag-alay ng buhay para sa kalayaan, babae o lalaki, noong unang panahon ng aming kasaysayan at gayun din naman sa panahon namin ngayon.

(Darasalin pagkatapos ng Rosaryo sa buong buwan ng Oktubre.)

Categories
Downloads

Pagpapamalas ng Suporta at Pagpapahayag ng Tiwala’t Paniniwala

Kami na mga mananampalataya at mamamayan ng Republika ng Pilipinas ay nagnanais magpahayag sa madlang Filipino ng aming matibay at di-matitinag na suporta, tiwala’t paniniwala para kina Obispo Teodoro Bacani, Jr., Obispo-Emerito ng Diyosesis ng Novaliches, Arsobispo Socrates Villegas ng Lingayen-Dagupan, Obispo Honesto Ongtioco ng Cubao, at Obispo Pablo Virgilio David ng Kalookan. Naninindigan kami at gumagarantiya na sila ay mga mabubuti at responsableng mamamayan at mga matatapat na kasapi ng mga pamayanang hinubog sa pananampalataya.

Naniniwala kami na sila ay mga walang kasalanan at ang mga paratang ng isang taong nagbibitiw ng magkakasalungat na mga pahayag ay hindi dapat sinasang-ayunan.

Naniniwala kami na ang matapat na pagpapahayag ng mga saloobing hinubog nang may pananagutan at hangaring makatulong at di mga pagbabanta ni paghahadlang lamang, ay isang magandang tanda ng pag-iral ng demokrasya sa ating bayan. Gayundin naman, naniniwala kami na ang katarungan, kapayapaan, katiwasayan at kasaganaan ng lahat ng mamamayan anupaman ang kanilang relihiyon o simulaing pampulitika ay mas matitiyak ng isang demokrasyang ang mga karapatang pantao lalu na ang karapatan para sa malayang pamamahayag ay lubos na iginagalang, pinangangalagaan at itinataguyod.

Naniniwala kaming isinasakatuparan lamang nina Obispo Bacani at ng kanyang mga kasama ang kanilang karapatan, karapatang ginagarantiyahan naman ng ating Saligang Batas, na ipahayag ang kanilang saloobin, at ang mga pagpapahayag nilang ito sa publiko bagamat madalas mapagkamalang sumasalungat sa ilang patakaran o pamalakad ng pamahalaan ay pagpapakita lamang ng kanilang pagiging butihing mamamayan na may tunay na pananagutan sa bayan, nagmamalasakit para sa kabutihan ng nakararami, kumakalinga sa mga mahihina, nakikiramay at nakikipagkaisa sa mga dukha at mga nagdaralita.
Naniniwala kami na mayroong karapatan ang bawat mamamayang Pilipino—ginagarantiyahan ng ating Saligang Batas—na maipahayag niya ang kanyang palagay at iniisip sa mga bagay-bagay na nangyayari sa kanyang paligid ng may buong kalayaaan, ayon na rin sa itinutulak ng kanyang konsensya, sapagkat sinabi na rin mismo ng Panginoong Jesukristo, “ang katotohanan ang magpapalaya sa inyo” (Jn 8:32).

Kaya naman puspos ng liwanag hatid ng Panimula ng ating Saligang Batas, “humihingi ng tulong sa Makapangyarihang Diyos, upang bumuo ng isang makatarungan at makataong lipunan at magtatag ng isang Pamahalaan na kakatawan sa aming mga mithiin at mga lunggatiin, magtataguyod ng kabutihan ng bawat isa, mangangalaga at magpapaunlad ng aming kamanahan, at titiyak para sa aming sarili at angkanang susunod ng mga biyaya ng kalayaan at demokrasya sa ilalim ng pananaig ng batas at ng pamamahalang puspos ng katotohanan, katarungan, kalayaan, pag-ibig, pagkakapantay-pantay at kapayapaan” kami ay buong tibay na nagpapahayag ng aming taos na paniniwala’t paninindigan sa lahat.

Sinang-ayunan at Nilagdaan:

Most Rev. Roberto O. Gaa, DD, Bishop of Novaliches
Most Rev. Antonio R. Tobias, DD, Bishop Emeritus of Novaliches,
Presbyteral Council and Clergy of Novaliches,
Association of Consecrated Life of Novaliches Diocese (ACLIND)
Pastoral Councils of 73 Parishes and Mission Areas in the Diocese of Novaliches
Council of the Laity of Novaliches (CLAN)
Quezon City Ecumenical Fellowship
Novaliches Diocesan Association of Parish PREX Secretariats (NDAPPS)
Knights of Columbus of Districts N-31-40
Daughters of Mary Immaculate
Mother Butler Guild (MBG)—Diocese of Novaliches
Couples for Christ (Global Mission Foundation) North A and North B
Catholic Women’s League
Pope’s Worldwide Prayer Network/Apostleship of Prayer
Divine Mercy Apostolate
Catholics for Family and Life (CFL)